Սիբիլն իր նոր տեսահոլովակում վիզուալ վերակենդանացրել է Կոմիտասին
«Արորն Ու Տատրակը» տեսահոլովակում Կոմիտաս վարդապետի իրական ձայնն է հնչում։
Երևանում կայացած ստեղծագործական հավաքի ժամանակ պոլսահայ երգչուհին ներկայացրել է նոր տեսահոլովակի ստեղծման պատմությունը։
Միջոցառման ներկաները ընդգծել են, որ Սիբիլը հերոս է, քանի որ տարիներ շարունակ Թուրքիայում կարողանում է ներկայացնել հայկական երգը հայերեն:
««Արորն Ու Տատրակը» հայրենիքի ու հայության ձայնն է»,- իր խոսքում նշել է ՀՀ առաջին արտգործնախարար Րաֆֆի Հովհաննիսյանը։
Հայ երաժշտության ամենանշանավոր դեմքերից մեկի՝ Կոմիտասի ձայնը, առաջին ձայնագրությունից ավելի քան մեկ դար անց, կրկին կհասնի ունկնդիրներին։
Սա Ստամբուլում ծնված հայ երգչուհի Սիպիլի վեց տարվա երազանքի արդյունքն է։
«Արորն ու Տատրակը» ստեղծագործության այս յուրահատուկ նախագիծը միավորում է Կոմիտասի պատմական ձայնագրությունն ու ժամանակակից երաժշտական մեկնաբանությունը։
Նախագծի նպատակն է ոչ միայն պահպանել և ներկայացնել Կոմիտասի երաժշտական ժառանգությունը, այլև նոր սերունդներին հասցնել նրա իսկ ձայնը։ Այս աշխատանքը պատմական ձայնագրությունը միավորում է ժամանակակից երաժշտական մոտեցման հետ՝ ստեղծելով յուրահատուկ կապ անցյալի և ներկայի միջև։
Երաժշտական գործիքավորումը կատարել է Վահան Նահապետյանը։ Միքսն ու մասթերինգը՝ Հմայակ Ռոստոմյանը։ Բլուլի կատարողն է Հասմիկ Մուրադյան-Հարությունյանը։ Տեսահոլովակի ռեժիսորն է Արտյոմ Աբովյանը։
Նախագիծն իրականացվել է Հերման Հինթիրյանի և AGBU-ի աջակցությամբ։
