«Այժմ մենք ունենք խաղաղություն Ադրբեջանի հետ, արդեն երկու տարի է, ինչ որևէ մեկը չի տուժել, սա աննախադեպ է մեր անկախացումից ի վեր, այժմ սերտորեն աշխատում ենք Ադրբեջանի հետ, որպեսզի ամրապնդենք ու ինստիտուցիոնալ դարձնենք խաղաղությունը»,- Եվրոպական քաղաքական համայնքի լիագումար նիստի իր ելույթում ասել է Նիկոլ Փաշինյանը՝ հավելելով. «Առաջին անգամ է, որ Ադրբեջանի նախագահը մասնակցում է միջոցառման, որը տեղի է ունենում ՀՀ-ում, թեպետ՝ հեռակապով: Հույս ունեմ, որ հնարավորություն կունենամ այցելելու Ադրբեջան՝ 2028-ին, երբ գագաթնաժողովն այնտեղ անցկացվի»:

***

Իլհամ Ալիևը Երևանում Եվրոպական քաղաքական համայնքի լիագումար նիստին մասնակցում է տեսակապով: «Ավելի քան 9 ամիս ապրում ենք խաղաղ ու սովորում ենք ապրել խաղաղության մեջ»,- իր խոսքում ասել է Ադրբեջանի նախագահը՝ անդրադառնալով օգոստոսին Վաշինգթոնում ստորագրված խաղաղության հռչակագրին:

***

«Մաղթում ենք Հայաստանին ու Ադրբեջանին բացառապես խաղաղություն, որը կլինի կայուն, տևական»,- Երևանում ընթացող Եվրոպական քաղաքական համայնքի լիագումար նիստի իր ելույթում ասաց Ուկրաինայի նախագահ Վլադիմիր Զելենսկին: Նա խոսեց նաև Իրան-ԱՄՆ հակամարտության մասին, Թրամփի վարած քաղաքականությունից, անդրադարձավ ռուս-ուկրաինական պատերազմին: