Ամանորյա և Սուրբ Ծննդյան տոներին ընդառաջ` դեկտեմբերի 15-ին, Երևանի կենդանաբանական այգին փոքրերին ու մեծերին հրավիրել էր բնական տոնածառի ընտրության, ինչպես նաև «Զարդարանքի տոն-մրցույթի», որտեղ այցելուները կարողացան իրենց ամանորյա բնական սոճիների ընտրությունն իրականացնել, իսկ երեխաները` մասնակցել «Զարդարանքի տոնին»։
Միջոցառմանը ներկա էր կենդանաբանական այգու բարեկամ, Հայաստանում ԱՄՆ դեսպան Ջոն Հեֆերնը, ով մշտապես կարևորում է նման միջոցառումների անցկացումը.«Այն ինչ կապված է կենդանիների, երեխաների և բնապահպանական կրթության հետ` մեզ գրավում է և միշտ փորձում ենք մասնակցել։ Միայն այս ձյունը բավական է, որ տոն ստեղծվի»։ Երեխաները յուրօրինակ զարդարանքներ պատրաստեցին և զարդարեցին իրենց սիրելի կենդանաբանական այգին։
Տոն-մրցույթին մասնակցեցին հանրակրթական դպրոցների շուրջ 50 աշակերտներ։ Լավագույնաշխատանքի հեղինակներն արժանացան մրցանակների։ Իսկ գլխավոր մրցանակը շնորհվեց մայրաքաղաքի Ջոն Կիրակոսյանի անվան թիվ 20 դպրոցի 6-րդ դասարանի աշակերտներին, ովքեր օգտագործեցին իրենց դպրոցի շինարարական աղբը և պատրաստեցին երեք տոնածառ։
Աշակերտները ստացան «Զարդարանքի տոն-մրցույթ» մասնակցության վկայական և մեկ տարվա անվճար այցելության հնարավորություն` Երևանի կենդանաբանական այգի,ինչպես նաև հուշանվերներ։
Օրվա տոնական տրամադրությամբ էլ այցելուները, ովքեր նախընտրում էին տոներին ունենալ բնական տոնածառ, ընտրեցին ամանորյա իրենց բնական սոճիները։
Ի դեպ, բնական սոճիները կարող են ոչ միայն զարդարել Ձեր բնակարանը, այլև հրաշալի ամանորյա նվեր կարող են լինել Ձեր հարազատների համար։ Եվ որ ամենակարևորն է, ծառերն արմատներով են` հատուկ ծաղկամաններով այն գարնանը տնկելու նպատակով։
Հենց այդ գաղափարից ոգևորված Երևանի կենդանաբանական այգի էին այցելել հայտնի հեռուստահաղորդավար և երգահան Անիտա Հախվերդյանը և նրա քույրը` լրագրող Նունե Հախվերդյանը.«Մենք այսօր երկու ծառ գնեցինք, քանի որ ունեմ աղջիկ, ով բնությամբ է ապրում, և կարևորը` ծառը կտրած չէ, այլ` շնչող է։ Սա մի նոր կուլտուրա է ներմուծում, որը լուծում է և բնապահպանական և մշակութային խնդիրներ»։ Ամանորյա տոների կապակցությամբ մինչև հունվարի 15-ը կենդանաբանական այգու մուտքը մինչև 16 տարեկանների համար կլինի անվճար։ Իսկ ս/թ.դեկտեմբերի 29-ից մինչև 2014թ. հունվարի 3-ը ներառյալ բոլոր այցելուների մուտքը կլինի անվճար։
Երևանի կենդանաբանական այգու մամլո ծառայություն
