ՀՀԿ-ն առաջադրեց Գալուստ Սահակյանի թեկնածությունն՝ ԱԺ խոսնակի պաշտոնում: Իսկ ո՞վ էր այլ բան սպասում այս իշխանություններից: Ազատիչն ասել է դեռ այս տարվա փետրվարի 15-ին ԵԿՄ համագումարում, որ, կոպիտ ասած՝ ինչ անում ենք, լավ են անում, ու այդպես էլ շարունակելու ենք: Մարդն իր խոսքի տերն է, մնում է ժողովուրդն էլ իր խոսքի տերը լինի, համախմբվի ու այս կարգի «լավ անողին», իր թիմակիցների հետ միասին, ուղարկի ուր որ հարկն ա: Թող հանրօգուտ աշխատանք կատարեն ուղղիչ աշխատանքային գաղութում ու մի քիչ խելքի գան, թեպետ համոզված են, որ սրանք անուղղելի են:
Բայց մյուս կողմից էլ պետք է փաստենք, որ ՀՀԿ–ից ում էլ առաջադրեին, «Գալուստ Սահակյան» էր լինելու։ ՀՀԿ խմբակցությունում բոլորն էլ «Գալուստ» են, քանզի երկրի ղեկավարի պաշտոնում Սերժ Սարգսյանն է։
ԱԺ նախագահի պաշտոնն այլևս երկրորդական է դարձել, և շարունակել այս թեման խորացնել, թե ով ավելի արժանի կլինի այդ ներկայացման երկրորդական դերում, կարծում եմ, իմաստ չունի: Բայց կա մի հարց, որն անպայման պետք է կյանքի կոչել: Բանն այն է, որ ՀՀԿ-ն հիմա մենակ է մնացել խորհրդարանում, և ունի ընդամենը 70 պատգամավոր, եթե գումարենք նաև «անկախ» պատգամավոր Էդմոն Մարուքյանին՝ կլինի 71: Իսկ Աժ նախագահն ընտրվում է փակ-գաղտնի քվեարկությամբ և հարկավոր է, որպեսզի թեկնածուն հավաքի 66 ձայն:
Այ հիմա ոչիշխանական ուժերն ու ՕԵԿ-ը (որը հայտարարել է, որ Սերժ Սարգսյանի հետ այլևս ընդհանուր ճանապարհ չունի և որ ժամանակին իրենց ձայներով են ՀՀԿ–ականները վեր–վեր թռել ծանր պահերին) պետք է վճռական փուլից առաջ մի հատ մարզանք անեն ու փորձեն տապալել Գալուստ Գրիգորիչի ընտրությունը: Չէ՞ որ առաջիկայում լուրջ պայքար է սպասվում, և բավական կրքեր են բորբոքվելու նաև կառավարության ծրագրի ընդունման ժամանակ: Ինչու չէ, նաև մի շարք օրենքների ընդունման հարցում, որոնք մեղմ ասած՝ այնքան էլ չեն բխելու ժողովրդի շահերից:
Ուստի ավելի հարմար առիթ, քան ԱԺ նախագահի ընտրության հանդեպ միասնական վերաբերմունք արտահայտելն է՝ հազիվ թե գտնվի: Մանավանդ, որ կիմանանք էլ, թե ՀՀԿ խմբակցության կազմում ովքեր են սեփական «Ես»–ն ունեցողներ, իսկ ովքեր՝ պարզապես կոճակներ:
Այ սա կլինի սթափության ահազանգ այս հղփացած իշխանութան ու, առաջին հերթին, Ազատիչի համար, որ իրենց թվում է, թե իրենց դեմ խաղ չկա: Չապացուցեն՞ք, որ խաղ կա, այն էլ ինչ խաղ, և այդ խաղի սկիզբն ազդարարվելու է ընդամենը մի քանի օրից:
Բացի այդ՝ հաշվիչ հանձնաժողովը, որը ՀՀԿ–ն ձևավորել է, ապօրինի է։ Մինչև քվեարկությունը պետք է քննության առարկա դարձնել այդ հարցը։

Արմեն Հարությունյան