Երեկ կայացած ՀՀԿ խորհրդի նիստում` Սերժ Սարգսյանի ելույթում ուշագրավ պարբերություն կա. «Անցած ժամանակահատվածում ես պարոն Կարապետյանի հետ երկար եմ զրուցել: Մենք քննարկել ենք շատ ու շատ հարցեր՝ տնտեսության զարգացմանը նոր թափ հաղորդելուց մինչև Հայաստանի հանրապետական կուսակցությանը նոր ոգի հաղորդելը»,-ասել է Սերժ Սարգսյանը:
Հետաքրքիր է, որ ՀՀԿ-ին նոր ոգի հաղորդելը Սերժ Սարգսյանը քննարկել է անկուսակցական Կարեն Կարապետյանի հետ, ով, ըստ ասեկոսեների, միշտ դեմ է եղել կուսակցական լինելուն, նույնիսկ Երևանի ավագանու ՀՀԿ ցուցակում ընդգրկվել է` առանց հանրապետական դառնալու, սակայն այս անգամ այլ տարբերակ չի ունենալու, քան անդամակցել Հանրապետականին ու իր «դրայվոտ» կենսագրության մեջ, ծննդավայրից բացի, ավելացնել նաև կուսակցական պատկանելության մասին տողը:
Խոսում են նաև, որ Կարեն Կարապետյանը նաև կարևոր դերակատարություն ու գործառույթներ է ունենալու կուսակցական գործերում:
Եվ այստեղ որոշիչը ոչ թե Կարեն Կարապետյանի ցանկությունն է լինելու, այլ Սերժ Սարգսյանի կամքը:
Հիշեցնենք, որ ժամանակին Կարեն Կարապետյանը ասում էր, թե վերջին պետական պաշտոնը, որ զբաղեցնելու է, քաղաքականությունն է լինելու:
Հայացք թերթից մի քանի տարվա վաղեմության հոդվածի մեջբերումը` հենց այդ հատվածով, տեղին է հիշել ու ասել` երբեք մի ասա «երբեք».
«-Ասում են` հաջորդ վարչապետը կարող է Դուք լինեք: Նման պլաններ ունե՞ք:
-Ոչ, չունեմ:
-Գուցե նախագա՞հն ունի:
-Չգիտեմ: Ես նման պլաններ չունեմ: Ավելին` շատ մեծ հույս ունեմ, որ վերջին պետական պաշտոնը, որը կզբաղեցնեմ, լինելու է քաղաքապետինը:
-Ինչո՞ւ:
-Որովհետև դրանից հետո հաստատ գնալու եմ բիզնես»:
Հեղինակ`
Ա.Գրիգորյան
