ԱԺ փոխնախագահ Էդուարդ Շարմազանովը պատասխանել է Ադրբեջանի Մեջլիսի փոխխոսնակին:
Ավելի շուտ Կուրն կթափվի Սեւ ծով, քան Ղարաբաղը կհայտնվի Ադրբեջանի կազմում. Asekose.am-ի հետ զրույցում ասաց Ազգային ժողովի փոխնախագահ Էդուարդ Շարմազանովը` ի պատասխան Ադրբեջանի Մեջլիսի փոխնախագահ Զիաֆետ Ասկերովի, որը հայտարարել էր, թե ղարաբաղյան հիմնախնդիրը կարող է լուծվել բացառապես Ադրբեջանի տարածքային ամբողջականության շրջանակում: «Ղարաբաղյան հիմնախնդիրը պետք է լուծվի Հելսինկյան երեք սկզբունքների հիման վրա` ժողովուրդների ինքնորոշման իրավունքը, հանրապետության տարածքային ամբողջությունը եւ ուժի չկիրառումը: Հենց դա են պնդում միջազգային միջնորդներն ու հայկական կողմը: Լեռնային Ղարաբաղի ստատուսն Ադրբեջանը չի որոշում, այլ միջազգային հանրությունը` հաշվի առնելով ու հիմնվելով Արցախի ժողովրդի կամքի վրա, եւ այստեղ երկրորդ կարծիք լինել չի կարող: Ի դեպ, այդ մասին նշում է ոչ միայն հայկական կողմը, այլեւ Մինսկի խմբի համանախագահները եւ համանախագահ երկրների ներկայացուցիչները»,- ասել է Շարմազանովը:
Նշենք, որ Ադրբեջանի Մեջլիսի փոխնախագահ Զիաֆետ Ասկերովը ավելի վաղ հայտարարել էր, թե ղարաբաղյան հիմնախնդիրը կարող է լուծվել բացառապես Ադրբեջանի տարածքային ամբողջականության շրջանակում:
«Ադրբեջանը թույլ չի տա արհեստականորեն հայկական երկրորդ պետություն ստեղծել իր տարածքում: Լեռնային Ղարաբաղը ադրբեջանական հող է: Մենք պատրաստ ենք Լեռնային Ղարաբաղին ամենաբարձր ինքնավարության ստատուս տալ` Ադրբեջանի կազմում: Դա մեր անփոփոխ դիրքորոշումն է»,- հայտարարել էր նա:
