Մի խումբ իրավապաշտպաններ բողոքի ակցիա են կազմակերպել Գլխավոր դատախազության դիմաց՝ պահանջելով «քրեական հետապնդում սկսել Հանրային հեռարձակման հանձնաժողովի ղեկավարության և Հ1 հեռուստաալիքի ղեկավարության նկատմամբ»։

Ավելի վաղ իրավապաշտպան Նինա Կարապետյանցը ֆեյսբուքյան իր էջում հայտնել էր, որ «այդ կառույցները, խախտելով գործող օրենսդրությունը, դարձել են իշխող կուսակցության քարոզչության խոսափողը՝ առաջ մղելով կուսակցության տեսակետը և ամեն կերպ գովազդելով այն, միաժամանակ սերմանելով անհամաձայնություն և ատելություն Հայ Առաքելական Եկեղեցու նկատմամբ...»։

***

«Սա հենց հիբրիդային պատերազմ է մեր ժողովրդի հանդեպ՝ Նիկոլ Փաշինյանի և իր կողմից ղեկավարվող Հ1-ի կողմից։ Մի կողմից նա ամեն օր մարդկանց շեղում է իր անհեթեթ պահվածքով, մյուս կողմից՝ Հ1-ը զավթված է իր դաշնակիցների, կուսակցականների կողմից, և թույլ չեն տալիս մարդկանց ներկայացնել իրենց տեսակետները»,- դատախազության դիմաց ակցիայի ժամանակ ասաց «Նժար» սահմանադրական շարժման համահիմնադիր Արտաշես Իկոնոմովը։