Կառավարության այսօրվա նիստը մեկնարկել է առողջապահության նախարար Արսեն Թորոսյանի լուրով` ըստ որի, Հայաստանում առաջին անգամ կատարվել է լյարդի փոխպատվաստում` կենդանի դոնորից:
Վարչապետ Նիկոլ Փաշինյանը կարևորել է իրադարձությունը, նաև հետաքրքրվել, թե ի՞նչ ընթացքում է սուր իշեմիկ կաթվածի բուժման ծրագիրը:
Նախարարը պատասխանել է, որ վերջին տվյալներով 85 պացիենտի արդեն բուժօգնություն է ցուցաբերվել, որից 60-ը առողջացումով դուրս են գրվել:
«Համարում ենք, որ ծրագիրը կարիք ունի ընդլայնվելու՝ այլ բժշկական կենտրոններ, նաև մարզային բժշկական կենտրոններ ընդգրկելու, ինչը մասնագետների օգնությամբ կփորձենք մյուս տարվանից կատարել: Այսինքն՝ դա համարում ենք շատ հաջողված ծրագիր»,- ասել է Արսեն Թորոսյանը:
Վարչապետը նաև հետաքրքվեց, թե դա պետպատվերո՞վ է իրականացվում, նախարարը դրական պատասխան տվեց.
«Այո, այս տարի նախատեսել էինք մոտ 400 մլն դրամ դրա համար: Հավանաբար կտեղավորվենք կամ մի քիչ կգերակատարենք՝ կարիք կլինի ուրիշ տողերից վերաբաշխել, որտեղ թերակատարում կլինի: Մյուս տարվա կանխատեսումներն ենք հիմա անում՝ միգուցե կարիք լինի մի քիչ աճեցնել, որը մյուս տարվա բյուջեով կնախատեսենք»:
Կարդացեք նաև՝ Ամբողջությամբ անվճար կատարվեց լյարդի առաջին փոխպատվաստումը Հայաստանում. Արսեն Թորոսյանի տեսանյութը
