Այսօր մի քիչ չափից ավել ակտիվացա, բայց մի թեմա կա, որի մասին չեմ կարող չգրել: Ինչ որ կիսասեռահասուն երեխաների մասնակցությամբ հայտնի տեսանյութից հետո, որտեղ այդ երեխաները լպիրշ բառապաշարով «հաճույքավատ» էին լինում (էսպես ավելի հայեցի չի՞ հնչում), համացանցը ցնցվեց համազգային ողբով՝ էս ինչ սերունդ ա մեծանում, բա մեր վախտը տհենց բաներ կա՞ր, անգամ եղան օգտատերեր, որոնք իրենց թույլ տվեցին անթույլատրելի, ես կասեի զազրելի արտահայտություններ՝ էս ինչ պոռնիկ սերունդ ա մեծանում, ինչու ա նոր սերունդը պոռնիկ մեծանում և այլն...
Նախ, ինչու եք մի քանի երեխայի վարքագծից ելնելով՝ վիրավորում մի ամբողջ սերնդի, ով է ձեզ այդ բարոյական իրավունքը տվել: Հեռախոսի ստեղծման պահից, անգամ ԽՍՀՄ տարիներին, անչափահասների և անգամ չափահասների մոտ հեռախոսով «գժվեցնելու» տարօրինակ զբաղմունքը մշտապես եղել է, նույն լկտի բառապաշարը կիրառվել է, պարզապես այն տարիներին հնարավոր չէր դա նկարահանել և նետել քոմենթչիների երախը, որպեսզի ազգի վրա կռռալու հերթական կրքին հագուրդ տան: Շատ վատ է, իհարկե, որ անչափահասները նմանատիպ արարք են թույլ տալիս, բայց այնպես չէ, որ դա միայն ժամանակակից սերնդին է բնորոշ, այդպիսի երևույթներ մշտապես եղել են:
Ի տարբերություն աճող սերնդի մասին միայն վատը արտահայտվողների՝ բերեմ մի քանի դիտարկում՝ իմ սերնդակիցների և նոր երիտասարդության կենցաղից.
Ի տարբերություն իմ սերնդակիցների՝ նոր սերնդի տղաները համեմատաբար քիչ են ծխում: Հիմա նրանց մոտ առավել մոդայիկ և գրավիչ է համարվում չծխելը...
Ի տարբերություն իմ սերնդակիցների՝ նոր երիտասարդությունը առավել քիչ է օգտագործում ալկոհոլ...
Ի տարբերություն իմ սերնդակիցների՝ հիմա առավել շատ իրավական գիտելիքներ ունեցող և սեփական իրավունքները պաշտպանող երիտասարդություն է ձևավորվում...
Ի տարբերություն իմ սերնդակիցների՝ նոր սերունդը իրեն զգում է երկրի տերը
Եթե մեր ժամանակ պայքարող երիտասարդներին մատերի վրա կարելի էր հաշվել՝ հիմա նրանց քանակը անհնար է որոշել...
Չեմ ցանկանում նյութս ծանրացնել՝ թվարկումների քանակով, բայց այն, որ շատ լավ սերունդ է մեծանում՝ պետք է գնահատել և ուրախանալ: Թե չէ մի հատ անկապ հոլովակի պատճառով համացանցում հիմար մտքեր փսխել մատաղ սերնդի մասին՝ ուղղակի բժշկական փաստ է...
