«Փաշինյանն ո՞վ ա, մենք տենց մարդ չենք ճանաչում, որ ճանաչեինք, էսօր էս վիճակին չէինք լինի»,- ոստիկանության այսօրվա գործողություններից հետո, լրագրողների հետ զրույցում, ասել է կիրանցի տղամարդը: «Եկել, հող են տալիս, ո՞ւմ հողն եք տալիս, ամո՛թ ձեզ»,- հավելել է նա:

Ավելի վաղ հայտնել էինք, որ ոստիկանությունը բիրտ ուժի կիրառմամբ բացել է ճանապարհը, կան մի քանի տասնյակ բերման ենթարկված քաղաքացիներ:

***

Ինչպես հայտնել էինք, Տավուշի թեմի առաջնորդ Բագրատ Սրբազանը ոստիկանության Իջևանի բաժանմունքի մոտ է, որտեղ բերման են ենթարկվել ճանապարհը փակած ավելի քան 30 կիրանցի տղամարդիկ: Բագրատ Սրբազանը հայտնեց, որ ոստիկանական ուժերը ճանապարհներն ամբողջությամբ շրջափակել են․ «Ճանապարհը փակ է Բաղանիսի կողմից, Սարի գյուղի կողմից, այսինքն՝ ամբողջությամբ շրջափակել են, ո՞ւմ են շրջափակել, ինչո՞ւ են շրջափակել։ Փորձելու են բռնի ուժ կիրառելով իրենց ականազերծման սև գործն անել։ Փաստացի ՀՀ իշխանությունները սեփական պետության և սեփական ժողովրդի դեմ անցել են լայնածավալ ահաբեկության և հանցանք են գործում սեփական հայրենիքի և սեփական տան ճանապարհին կանգնած մարդկանց նկատմամբ, ինչը ոչ միայն անընդունել է, այլև դատապարտելի»,- ասաց Բագրատ Սրբազանը՝ վստահեցնելով, որ սրանով չեն կարող ո՛չ վախեցնել, ո՛չ ետ պահել պայքարից:
Բերման ենթարկված բոլոր կիրանցեցիներն ազատ են արձակվել:

***

«Գիշերը ոստիկանական զորքերը հարձակվել են Կիրանցի վրա։ Ջարդ, փշուր, ձերբակալվածներ, բերման ենթարկվածներ»,- այս մասին ֆեյսբուքյան իր էջում գրել է փաստաբան Ռուբեն Մելիքյանը:

ԱԺ ընդդիմադիր պատգամավոր Գառնիկ Դանիելյանի գրառումը՝ կից տեսանյութով. «Այս պահին Իջևանի ոստիկանության բաժնում եմ: Վաղ առավոտյան ուժ կիրառելով և հարվածներ հասցնելով այստեղ են բերել ճանապարհը փակած կիրանցեցի տղամարդկանց»:

Նախնական տվյալներով՝ ավելի քան 30 քաղաքացի տարվել է Տավուշի մարզի ոստիկանության տարածքային բաժին:

***

***