Կարդացի որոշ գծատերերի սպառնալիքները ու շա՜տ տխրեցի, չգիտեմ` ինչ անեմ…
Լավ, մենք ի՞նչ անենք, ո՞նց անենք, որ որոշ գծատերերի հետ պահենք այդ ազգակործան, ճակատագրական մտքից… Բա մենք ի՞նչ կանենք, եթե իրոք քաղաքապետարանը վերանայի ուղեվարձը, քչացնի կամ թողնի հինը, և իրոք նրանցից ոմանք հրաժարվեն ավտոբուսների գծերից: Դա նման կլինի Հիչկոկի ֆիլմերին, մենք չենք դիմանա այդ հարվածին, սարսափելի է անգամ մտածել…
Այնուամենայնիվ, պարոնայք գծատերեր, կոչ եմ անում ձեզ հրաժարվել գծերից, մենք մի կերպ կդիմանանք այդ հարվածին: Թեև դժվար է, բայց մի կերպ կդիմանանք: Եվ ընդհանրապես բոլոր գծատերերը, որոնք բիզնես պլաններով, հաշվարկներով, բանով ժամանակին շահել են այդ «ոչ եկամտաբեր» բիզնեսով զբաղվելու իրավունքը, հանուն մեզ` քաղաքացիներիս, թող հիմա հրաժարվեն: Գուցե այդ դեպքում ի վերջո հնարավոր լինի Հայաստանում կիրառել աշխարհի քաղաքակիրթ երկրների ուղևորափոխադրման փորձը, իրականացնել մարդավայել քաղաքակիրթ ուղևորափոխադրում` առանց «գծատեր» հասկացության, առանց այդ գազել-մազելների… Ուղղակի ժամանակն է արդեն հասկանալ իրողությունը և առարկայական, հրապարակայնորեն, այդ ոլորտի իրական մասնագետների, տնտեսագետների, հասարակայնության ներկայացուցիչների հետ համատեղ նստել և քննարկել: Քննարկել հիմա, առանց ձգձգելու… Ժամանակն է վերջապես հիմնավոր վերափոխել այդ «գիծ» կոչված հասկացությունը, առանց հեծանիվ հայտնագործելու, ընդամենը ուսումնասիրել այլ երկրների առաջավոր փորձը, համապատասխան մոնիտորինգ իրականացնել, փուլ առ փուլ, հանգիստ, հետևողական անցնել նոր, առաջավոր համակարգի ձևավորմանը: Արդյունքում, անշուշտ, կվերանա նաև ստվերայնությունն այդ բնագավառում կամ գոնե կնվազի…
Երևանի նախկին փոխոստիկանապետ Ռոբերտ Մելքոնյանի գրառումը
Ֆեյսբուք
