Քաղաքագետ Հայկ Մարտիրոսյանը ֆեյսբուքյան իր էջում գրել է. «Մինչև բանակի ղեկավարությունում կռտած գեներալներից բացի հայրենասեր և ոչ կրեմլաստրուկ չհայտնվի` Հայաստանը կործանման գործընթացից հետ չի կանգնի:
Հայ ժողովուրդը վճռականորեն որոշել է ինքնասպնվել: Դա շատ կամային, բայց իր կամայնությամբ խելագար որոշում է: Բայց այդ որոշումը կա: Այն ընդունված է: Այն գործարկման փուլում է: Եվ նրան այդ հարցում սիրով օգնում է հարևան նորահայտ քիրվա պետությունը:

Եվ միայն վճռական միակը կամ միակները կարող են փրկել երկիրը: Նրանք, որ թքած կունենան սեփական ողորմելի գոյության, զինվորականների` ստրուկ և ապաքաղաքական լինելու վերաբերյալ ռուսական տխմարաբանության վրա, նրանք, որ կհասկանան, որ իրենք կարող են կա՛մ սեփական ոչնչությամբ երկիր կործանել և կա՛մ իրենց նորահայտ արժանապատվությամբ երկիր ու ինքնասպանվող ժողովուրդ փրկել:
Զինվորականները քաղաքականությամբ պարտավոր են զբաղվել և զբաղվում են աշխարհի բոլոր այն պետություններում, որտեղ վտանգված է երկրի ճակատագիրը:
Եվ անգամ ԱՄՆ-ում, որտեղ անչափ կայուն և կայացած պետական ինստիտուտներ կան, բանակը խառնվեց քաղաքականությանը, երբ անցյալ տարի` իշխանության մնալու ցանկություն հայտնած նախագահին հրապարակայնորեն հասկացրեց, որ չի կարող մնալ, որովհետև չի կարելի մնալ:
Փրկությունը բանակում է:
Բայց հայկական բանակում մարդ չկա: Կծնվի՞, կզարթնի՞ արդյոք այդ վճռական մեկը կամ այդ վճռական մեկի խիղճը, հայտնի չէ:
Հայտնի է միայն մի բան: Հասել ենք մի վիճակի, երբ ամեն բան այդ անհայտ կամ անգամ գոյություն չունեցող մեկից է կախված:
Կա՞ այդ մեկը: Չկա՞ այդ մեկը ...
Վախենալու է մտածելն անգամ ...»: