Ֆրանկոֆոնիայի գագաթնաժողովի քննարկումներն ինչ-որ մի պահ դանդաղեցին՝ կապված իշխանափոխության գործընթացի հետ, բայց հանկարծ տպավորություն չստեղծվի, որ նոր կառավարությունը 0-ից է սկսում: Այս մասին իր ելույթում ասաց ԱԺ ՀՀԿ խմբակցության անդամ Մարգարիտ Եսայանը:
Նա նշեց, որ Ֆրանկոֆոնիայի գագաթնաժողովի անցկացումը նախկին իշխանությունների հսկայական ջանքերի արդյունք է։ Այդ հարցում ըստ պատգամավորի՝ մեծ ազդեցություն է ունեցել նաև Շառլ Ազնավուրը։
«Հանկարծ էնպիսի տպավորություն չստեղծեք, Ֆրանկոֆոնիան ՀՀ բերելը դուք սկսում եք զրոյից, Ձեզ պատրաստի մատուցված է այս կազմակերպության լիստը, ընդամենը Դուք շարունակում ենք, խնդրում ենք շարունակել այն այնպիսի պատվախնդրությամբ այնպիսի որակով, ինչպիսին Ձեզ հանձնել ենք»:
Մարգարիտ Եսայանն անդրադարձավ նաև մամուլի հրապարակումներին.
«Կեղծ տեղեկություն տարածվեց մեր անունից։ Որոշ կուսակցությունների և լրատվամիջոցների պետք է խնդրեմ չափը չանցնել։ Կեղծիքը, ապատեղեկատվությունը նույնպես պետք է չափ ու սահման ունենան ՀՀԿ-ն կանգնած է համաժողովի կազմակերպման ակունքներում»,- նշեց Եսայանը։
Պատգամավորը կարծիք հայտնեց, որ գագաթնաժողովի օրերին կարևորագույն միջոցառումը տնտեսական ֆրանկոֆոնիան է։
