Դեկտեմբերի 14-ին Հրազդան քաղաքում հերթական դաժանությունն է տեղի ունեցել։ Ուշ երեկոյան անհայտ անձինք տարբեր թաղամասերում սպանել են փողոցում թափառող մի շարք շների, որոնցից միայն երկուսին է հաջողվել ողջ մնալ։
Տվյալ թեմայի շուրջ Asekose.am-ը զրուցել է «Դինգո թիմ» հասարակական կազմակերպության համակարգող Գոհար Մանուշակյանի հետ, ով կատարվածից մանրամասներ է պատմել․
«Սա առաջին դեպքը չէ, որ Հրազդանում նման բան է տեղի ունենում։ Մեզ դիմել են քաղաքի բնակիչները, որպեսզի զբաղվենք այս ցավալի հարցով։
Շներից երկուսին է հաջողվել ողջ մնալ։ Նրանցից մեկը համեմատաբար լավ վիճակում է, նա մնացել է տարածքում, բնակիչներն իրենք կխնամեն շան վերքը, իսկ մյուս շունը տեղափոխվել է կլինիկա։ Ինչ վերաբերում է սպանված շների դիակներին, ապա այդ անձինք հասցրել են վերացնել դրանք, բացառությամբ՝ մեկի։ Այդ շանը խնամող բնակիչը կարողացել է փախցնել դիակը, որն արդեն տեղափոխվել է Երևան՝ դիահերձման։ Այդ շունը ձագ էր, մոտավորապես 3,5 ամսական, կրակել են նրա սրտին»,- պատմեց Գոհար Մանուշակյանը։
Այս հարցին՝ արդյո՞ք արդեն հաջողվել է պարզել, թե ովքեր են կատարվածի հեղինակները, Գոհար Մանուշակյանը պատասխանեց․
«Ոստիկանությունը դեռևս ոչինչ չի կարողացել պարզել, քանի որ կրակել են որսորդական հրացանով։ Իսկ քանի որ դրա փամփուշտը կրակելուց հետո մանր բեկորների է վերածվում, և դրա վրա ոչ մի նշան չկա, նույնիսկ գրված չէ, թե ում անունով է այն գրանցված, պարզելն այդքան էլ հեշտ չէ։ Այս երևույթը, սակայն, բավական նման է պատվերի։ Եթե նախորդ անգամ, երբ կրկին նման դեպք էր տեղի ունեցել, տեղեկություն կար, թե ով է կրակողը, ապա այս անգամ տարբեր թաղամասերում է դեպքը տեղի ունեցել, այսինքն՝ մեկը, ով ուղղակի շուն չի սիրում, դուրս չէր գա տարբեր թաղամասեր, շներ փնտրեր և կրակեր։ Սա, կարծում եմ, պատվեր էր՝ արված գլխաքանակի իջեցման համար։ Վերջին վեց ամսվա մեջ սա արդեն երրորդ դեպքն է, երբ Հրազդանում այսպիսի դաժան բան է կատարվում»,- եզրափակեց «Դինգո թիմ» հասարակական կազմակերպության համակարգող Գոհար Մանուշակյանը։
Հեղինակ՝ Ս․Խաչատրյան
