Վրաստանում հայտնաբերվել է ՀՀ վճռաբեկ դատարանի նախկին նախագահ Արման Մկրտումյանի առանձնատան վրա կատարված հարձակման գործով հետախուզվող 49-ամյա Գագիկ Դանոյան: Այս մասին հայտնել է ՀՀ քննչական կոմիտեի նախագահի խորհրդական Սոնա Տռուզյանը:

Ձեռք բերված ապացույցների հիման վրա որոշում է կայացվել Դանոյանին մեղադրյալ ներգրավել ՀՀ քրեական օրենսգրքի 34-104-րդ հոդվածի 2-րդ մասի 1-ին, 6-րդ եւ 7-րդ կետերով, 175-րդ հոդվածի 2-րդ մասի 1-ին, 3-րդ եւ 4-րդ կետերով ու 235-րդ հոդվածի 1-ին մասով:

Հետախուզվողը հայտնաբերվել է Վրաստանում և ներկայումս իրավասու մարմինները ձեռնարկում են անհրաժեշտ քայլերը՝ նրա Հայաստան արտահանձնումը կազմակերպելու համար։

Հիշեցնենք, որ օգոստոսի 28-ին ավազակային հարձակում էր տեղի ունեցել Կոտայքի մարզում։ Ժամը 22-ի սահմաններում դիմակավորված և զինված երեք հոգի ներխուժել են Ձորաղբյուր գյուղի Բանակի փողոցում գտնվող առանձնատներից մեկը։ 30-ամյա տանտերը հոր հետ դիմադրություն է ցույց տվել․ գազային ատրճանակով կրակել է հարձակվողներից մեկի ուղղությամբ, որը զինված էր ինքնաձիգով։ Հայր և որդի նրան վնասազերծել են։ Ընթացքում հարձակվողներից երկուսը անկանոն կրակոցներ են արձակել ու փախել։

Կարդացեք նաև՝  Արման Մկրտումյանի ամառանոց ներխուժածներից մեկը ոստիկան է. նրան բերման են ենթարկել. նոր մանրամասներ

Ոստիկանության տեսանյութը` Վճռաբեկ դատարանի նախկին նախագահի առանձնատան վրա զինված ավազակային հարձակման վերաբերյալ