UFC-ի թեթև քաշային կարգի վարկանիշային աղյուսակի առաջատար Արման Ծառուկյանը պատմել է տափօղակով հոկեյի հանդեպ իր վաղեմի նախասիրության մասին։ Այս մասին գրում է ԱրմՍպորտ.am-ը։

«9-ից 17 տարեկանում հոկեյ եմ խաղացել։ Իսկ 6-ից 9 տարեկանում զբաղվել եմ ազատ ոճի ըմբշամարտով։ Հոկեյն ինձ մոտ ավելի լավ էր ստացվում, քան ըմբշամարտը։ Ցանկանում էի պրոֆեսիոնալ հոկեյիստ դառնալ և դրանով գումար վաստակել։

Հետագայում ըմբշամարտին անցնելը նման էր զրոյից սկսելուն։ Բայց քանի որ դեռ երիտասարդ էի, կարողացա արագ հարմարվել»,- ասել է Ծառուկյանը UFC-ի նախկին աստղ Դեմետրիուս Ջոնսոնի փոդքաստի ժամանակ։

Հիշեցնենք, որ 29-ամյա Արման Ծառուկյանի ակտիվում խառը մենամարտերում գրանցված է 23 հաղթանակ և 3 պարտություն։ Դեկտեմբերի վերջին Ծառուկյանը Երևանում գրեփլինգի կանոններով գոտեմարտ էր անցկացրել Շարա Բուլետի հետ, որն ավարտվել էր ոչ-ոքի։

Դիտեք նաև՝