Հայաստան-Բուլղարիա խաղը, որ ի սկզբանե լարված պայքար էր ենթադրում, ավարտվեց մեր ընտրանու հաղթանակով:
Խաղի հաշիվն առաջին խաղակեսի վերջին րոպեին բացեց Արազ Օզբիլիսը` տուգանային հարվածից:
Երկրորդ խաղակեսի 60-րդ րոպեին բուլղարացիները հավասարեցրին խաղի հաշիվը` կրկին տուգանային հարվածից. գոլի հեղինակ դարձավ Իվելին Պոպովը:
Դրանից հետո բուլղարացիները խաղն անցկացնում էին 9 հոգով, քանի որ մրցավարը, կոպիտ խաղի համար, երկու հոգու հեռացրել էր խաղադաշտից, սակայն հայ ֆուտբոլիստները միայն խաղի 87-րդ րոպեին` Յուրա Մովսիսյանի կատարմամբ, կարողացան կրկնապատկել խաղի հաշիվը` 2:1 :
Նշենք, որ Հայաստան-Բուլղարիա խաղի ժամանակ հայ ֆուտբոլասերները պաստառ էին բարձրացրել` բուլղարացի գուշակ Վանգայի պատկերով և հետևյալ մակագրությամբ` Արդարությունը կվերականգնվի Հայաստանում, հաղթանակը հայերինն է:
Հիշեցնենք, որ Հայաստանի ֆուտբոլի ազգային հավաքականի երկրպագուները Զվարթնոց օդանավակայանում բուլղարացիների ֆուտբոլիստներին ու նրանց հետ ժամանած երկրպագուներին դիմավորել են սուլոցներով և «цигани» վանկարկումներով, քանի որ Սոֆիայում կայացած առաջին խաղի ժամանակ բուլղարացի երկրպագուները Հայաստանի հավաքականի ֆուտբոլիստների հասցեին վանկարկել էին «ցիգաններ»:
