tsayg.am-ը գրում է, որ Շիրակի մարզի Գետափ համայնքում առաստաղից կախված վիճակում հայտնաբերվել է նույն համայնքի բնակիչ, 23 ամյա Անուշիկ Գարեգինի Զաքարյանի դին: Ըստ համայնքապետ Գոռ Ստեփանյանի, Զաքարյաններն ապրել են սոցիալապես անբարենպաստ պայմաններում, ընտանիքի անդամները, մեծամասամբ Անուշիկը, մոմեր և սրբապատկերներ էին վաճառում ինչպես Գետափում, այնպես էլ Գյումրիում և Արթիկում: Աղջկա եղբայրը հուլիսի 10-ին զինվորական ծառայության է մեկնել: Դեպքից երկու օր առաջ Անուշիկի մայրն ու փոքր եղբայրը գնացել են Նուբարաշեն` զինվորին տեսության: Անուշիկը մնացել է տանը մենակ: Երբ մայրն ու եղբայրը վերադարձել են տուն` աղջկան գտել են տան փայտե ծածկի գերանից կախված:
Դատաբժշկական փորձաքննությամբ դիակի վրա նախնական տեղեկությունների համաձայն բռնության հետքեր չեն հայտնաբերվել: Համայնքապետի խոսքերով, ոչ Անուշիկ Զաքարյանը, ոչ էլ նրա ընտանիքի անդամները հարևանների հետ բացահայտ խնդիրներ չեն ունեցել: Թե կատարվածն ինչի հետևանք է, համայնքապետը դժվարանում է պատասխանել:
Դեպքի հետ կապված Արթիկի քննչական բաժնում հարուցվել է քրեական գործ:
Անուշիկ Զաքարյանի ազատամարտիկ հայրը` Գարեգինը, մահացել էր մեկ տարի առաջ: 2013 թվականի մայիսի 9-ին գյուղում կազմակերպված միջոցառման ընթացքում Գարեգինին մեծարել և շքանշան են նվիրել: Նույն օրը գիշերն էլ ազատամարտիկը մահացել էր ինֆարկտից:
