ՀՀԿ խմբակցության պատգամավոր Կարեն Կարապետյանի վերջին հարցազրույցում հնչած տեսակետները բացառապես նրա անձնական մոտեցումներն են: Այս մասին հաղորդագրություն է տարածել Կարեն Կարապետյանի գրասենյակը:
«Հարգելի բարեկամներ, վերջին մի քանի ժամվա ընթացքում բազմաթիվ զանգեր եւ էլեկտրոնային նամակներ ենք ստանում՝ կապված ՀՀ ԱԺ պատգամավոր Կարեն Կարապետյանի՝ կայքերից մեկին տված հարցազրույցի հետ:
Հաշվի առնելով հարցադրումները՝ հարկ ենք համարում տեղեկացնել, որ հարցազրույցում հնչած տեսակետները բացառապես պարոն Կարապետյանի անձնական մոտեցումներն են եւ որեւէ կապ չունեն ՀՀԿ պաշտոնական տեսակետի հետ»,-ասված է հայտարարությունում:
Նշենք, որ ԱԺ ՀՀԿ խմբակցության պատգամավոր Կարեն Կարապետյանը մասնավորապես հայտարարել էր, թե ճիշտ չի լինի, որ ՀՀԿ-ն հանդես գա սեփական թեկնածուով:
Ավելացնենք նաև, որ ՀՀԿ խմբակցության ղեկավար Վահրամ Բաղդասարյանն այս առիթով կայքերից մեկին ասել է. «Դա համարեք որպես մասնավոր կարծիք, մասնավոր կարծիքները չեն կարող արտահայտել խմբակցության դիրքորոշումը: Մենք հարգում ենք յուրաքանչյուր մասնավոր կարծիք»:
Հիշեցնենք, որ մայիսի 1-ին կայանալիք վարչապետի ընտրությանն առայժմ թեկնածու առաջադրելու մասին հայտարարել է միայն «Ելք» խմբակցությունը:
Նրանք առաջադրել են իրենց խմբակցության ղեկավար, «Իմ քայլը» նախաձեռնության առաջնորդ Նիկոլ Փաշինյանի թեկնածությունը:
Մյուս խմբակցությունները դեռեւս իրենց դիրքորոշման մասին չեն հայտնել:
Թեկնածու առաջադրելու վերջնաժամկետն ապրիլի 30-ն է:
