«Երևանում կայանալիք ՀՀ-ԵՄ գագաթնաժողովն ունի խորհրդանիշ՝ 2 կլորակներ, ինչ որ իմաստ ունեն․ մեր առաջարկած խորհրդանիշն այլ է, որովհետև Հայաստանում պարզապես 2 կլորակներ չեն, Հայաստանում այդ կլորակները կանդալներ են։ Եվ մեր ուղերձը եվրոպական հանրույթին հետևյալն է․ սա է այսօրվա Հայաստանի իրական պատկերը՝ կանդալված մարդ, կանդալված ազգ, կանդալված պետություն։ Եվ մեր կոչն իրենց շատ պարզ է․ դադարեք երկդիմությունը, կանգնեք ժողովրդավարության կողքին»,- այսօր ասուլիսի ժամանակ հայտնել է ՀՀԿ փոխնախագահ Արմեն Աշոտյանը՝ խոսելով մայիսի 4-5-ը Երևանում սպասվող Հայաստան-ԵՄ գագաթնաժողովի մասին։

***

«Ավելի լավ օր, քան մայիսի 4-ը, երբ Երևանում ընթանում է Եվրոպայի քաղխորհրդի գագաթնաժողովը, դժվար է մտածել համընդհանուր ընդդիմադիր հանրահավաք անցկացնելու համար». Արմեն Աշոտյանը՝ «Հայաստան» դաշինքի պատգամավոր Իշխան Սաղաթելյանի՝ ընդդիմության համատեղ հանրահավաք անցկացնելու առաջարկի մասին

Հանրապետական կուսակցության փոխնախագահը ճեպազրույցում հայտարարել է, որ գագաթնաժողովին զուգահեռ ընդդիմության միասնական հանրահավաքի անցկացումը բնական և տրամաբանական կլինի: