«Քանի որ Գագիկ Ծառուկյանն առիթներ ունեցել է հայտարարելու, որ հեռախոս չունի, հուսանք իրեն չեն գաղտնալսում»,- այս մասին այսօր կայացած ասուլիսում կես կատակ-կես լուրջ նշեց «Առաջարկ Հայաստանին» թիմի նախընտրական ցուցակում ընդգրկված, ԲՀԿ խոսնակ Իվետա Տոնոյանը՝ անդրադառնալով հարցին, թե մտավախություն չկա՞, որ իրենց ևս գաղտնալսում են։

«Հուսանք` իշխանությունն օրենքը մահակ չի դարձնելու՝ ընդդիմադիրների հետ հաշվեհարդար տեսնելու գործընթացում»,- ընդգծեց Տոնոյանը։

***

«Մենք չունենք օրենքով որևէ պարտադրանք, սահմանափակում՝ հնչեցնելու այս կամ այն ժամանակահատվածում մեր վարչապետի թեկնածուի անունը»,- այսօր լրագրողների հետ զրույցում հայտարարեց ԲՀԿ խոսնակ Իվետա Տոնոյանը՝ անդրադառնալով հարցին, թե ո՞վ է լինելու ԲՀԿ-ի վարչապետի թեկնածուն։ Նա հավելեց, որ կգա պատեհ պահը և բոլոր հարցերի պատասխանները կտրվեն։ «Հարմար պահի Գագիկ Ծառուկյանը կհնչեցնի վարչապետի թեկնածու անունը։ Շտապելու հարց չունենք, գնում ենք քայլերով․․․ ԲՀԿ վարչապետի թեկնածուի անունը կլսենք շատ շուտով՝ առաջիկա օրերին»,- վստահեցրեց Տոնոյանը։

***

Այսօր կայացած ասուլիսում «Առաջարկ Հայաստանին» թիմի նախընտրական ցուցակում ընդգրկված, ԲՀԿ խոսնակ Իվետա Տոնոյանը ներկայացրեց ԲՀԿ նախընտրական ծրագրի հիմնական թեզերը՝ նշելով, որ ԲՀԿ-ն նախընտրական քարոզարշավին մասնակցում է 10 առաջարկով։

«Երաշխավորված խաղաղություն՝ հավասարակշռված արտաքին քաղաքականության տրամաբանության մեջ, Ադրբեջանի հետ հարաբերությունների կարգավորում, որն իրենից ենթադրում է բացառիկ և բացարձակ ասպեկտներ, որտեղ շահը հայոց պետականության շահն է լինելու․․․, բանակը՝ որպես անվտանգության երաշխիք, և հիմնաքարերից են տնտեսության վերաբերյալ թեզերը․․․ Ծրագիրն ամփոփվում է միասնական հայկական աշխարհ ունենալու տեսլականով»,- ընդգծեց Տոնոյանը։